Maserati täze «GranCabrio Modena» modelini hödürledi. Ol 490 at güýjüni öndürýän hereketlendiriji bilen enjamlaşdyryldy diýip, «autoevolution» neşiri habar berýär.
Italiýaly awtoulag öndürijisi Maserati kompaniýasy «GranCabrio» ulaglarynyň hataryny täze «Modena» wersiýasy bilen giňeldýär. Täze wersiýa 3,0 litrlik goşa turboly V6 hereketlendiriji bilen enjamlaşdyrylan. Bu hereketlendiriji 490 at güýjüni öndürýär. Täze kabriolet doly hereketlendiriji ulgam bilen üpjün edilen we ol bary-ýogy 4 sekuntda 100 km/sag tizlige çykyp bilýär. Onuň iň ýokary tizligi bolsa 300 km/sag-e ýetýär.
Mundan öň «GranCabrio» hatarynda diňe iki görnüş bardy: biri 761 at güýji bolan doly elektrikli «Folgore» wersiýasy, beýlekisi bolsa 550 at güýji bolan «Trofeo» wersiýasy. Täze model bulara garanyňda has arzan, şeýle-de bolsa tizligi ýa-da kuwwaty boýunça olardan pes däl.
«Maserati GranCabrio Modena» modeliniň resmi bahasy häzirlikçe mälim edilmedi. Ýöne onuň bahasynyň «Trofeo» wersiýasyndan (292 müň 166 ýewro) arzan, emma doly elektrikli «Folgore» wersiýasyndan (208 müň 250 ýewro) has gymmat bolmagyna garaşylýar.
