Dueýn Jonson, Leonardo Di Kaprio we Emili Blant tanymal režissýor Martin Skorsezäniň täze filmine gatnaşyp biler. Filmiň ady heniz yglan edilmeýär diýip, Deadline neşiri habar berýär.
Maglumatlara görä, sýužet 1960-1970-nji ýyllarda ýaýbaňlanyp, onda Gawaýiden jenaýat baştutany adalarda guramaçylykly jenaýatlaryň üstünden gözegçiligi öz eline almak isleýän bäsdeşlere garşy göreşmeli bolýar.
“Sýužet hökmürowanlyga rehimsiz ýykgyn etmek bilen, öz watanyny gorap saklamak ugrunda göreşen adamyň gürrüň berilmedik hakyky wakasyna esaslanýar. Medeni diri galmak ugrundaky göreşiň garaşylmadyk ýerde – jennetde bolup geçýändigini görkezýän mafiýa baradaky soňky beýik amerikan rowaýaty” – diýip, Deadline geljekki filmi suratlandyrýar.
Mafiýa başlygynyň roluny asly Gawaýiden bolan Jonson oýnap biler. Di Kaprio bilen Blantyň nähili rollary ýerine ýetirjekdigi belli däl. Aktýorlaryň üçüsi-de we Skorsezäniň özi hem prodýuser hökmünde çykyş eder.
Filmiň önümçiligi çalt depginde alnyp barylýar. Ähtimal, ýakyn wagtda taslama barada has giňişleýin maglumatlar peýda bolar diýip, neşir belleýär.
