BMG-niň Ženewadaky wekilhanasynda Türkmenistanyň hemişelik wekili hem-de Şweýsariýadaky ilçisi Wepa Hajiýew «Zeit-Fragen/Current Concerns» şweýsar gazetinde çykyş etdi we «Diva» žurnaly bilen söhbetdeşlik geçirdi.
Gazetde Türkmenistanyň hemişelik Bitaraplygynyň 30 ýyllygyna we Halkara parahatçylyk we ynanyşmak ýylynyň ähmiýetine bagyşlanan üç makala çap edildi. Olarda Türkmenistanyň bitaraplyk derejesiniň taryhy ähmiýeti, ynanyşmak diplomatiýasyna goşandy we parahatçylygy pugtalandyrmak boýunça halkara tagallalaryndaky işjeň orny beýan edilýär.
«Neýtralnyý Türkmenistan» gazetiniň belleýşi ýaly, bu makalalarda Türkmenistanyň öňe süren Halkara parahatçylyk we ynanyşmak ýyly konsepsiýasyna aýratyn üns berildi.
«Diva» žurnalyna beren söhbetdeşliginde ilçi W.Hajiýew bitaraplygyň sebit durnuklylygyny üpjün etmekdäki taryhy ähmiýetini we Türkmenistanyň halkara parahatçylyk başlangyçlaryna işjeň gatnaşýandygyny nygtady.
Şeýle-de, ol bitaraplygyň ynsanperwer we ykdysady taraplary, Türkmenistanyň halkara hyzmatdaşlygy, ekologiýa howpsuzlygyna goşandy, durnukly ösüş we energetika diplomatiýasy baradaky meseleler barada maglumat berdi.
«Zeit-Fragen/Current Concerns» we «Diva» neşirleri halkara gatnaşyklary, diplomatiýa we ählumumy kynçylyklar bilen bagly çuňňur seljerme makalalary bilen tanalýar. Bu neşirler köplenç dürli döwletleriň parahatçylykly hyzmatdaşlyga we durnukly ösüşe gönükdirilen oňyn başlangyçlaryny beýan edýär.
