Hytaýly alymlar rekord derejede takyklykda surata düşürmäge ukyply lazer kamerany döretdiler. Täze kamera kosmosa ýerleşdirilende, pes orbitadan ownuk jisimleri, hatda adamlaryň ýüz keşplerini hem saýgarmaga mümkinçilik berer. Bu barada tehnologiýany işläp düzen alymlara salgylanyp, «South China Morning Post» (SCMP) neşiri habar berýär.
Taslama Hytaý Ylymlar akademiýasynyň Aerokosmiki maglumat ylymlary institutynyň hünärmenleri tarapyndan işlenip taýýarlandy. Geçirilen synaglaryň dowamynda, enjam 100 km-den hem uzak aralykdan «millimetr takyklykda» birnäçe surat düşürdi. Mundan ozal, şeýle takyklykda surata düşürmek «mümkin däl» diýlip hasap edilýärdi.
Kameranyň esasy bölegi 103 Wt kuwwatly lazerden ybarat. Ol giň diapazonda işleýär. Enjam maglumatlary sanly görnüşde we häzirki wagt tertibinde işläp bilýär. Täze tehnologiýa 1,7 mm ululykdaky ownuk jikme-jiklikleri hem tapawutlandyryp bilýär. Şeýle-de obýektlere çenli aralygy 15,6 mm takyklykda ölçemäge ukyply. Kameranyň takyklyk derejesi häzirki zaman linzaly kameralardan we teleskoplardan takmynan 100 esse ýokarydyr.
