Toyota özüniň ykjam krossoweri «C-HR-iň» täzeden enjamlaşdyrylan görnüşini – «High Hero» modelini hödürledi. Bu model öňki «Premiere Edition-yň» ornuna geçýär. Täze görnüş has kämilleşdirilen tehnologiýalary, üýtgeşik dizaýn aýratynlyklaryny we üç sany gibrid hereketlendiriji ulgamyny öz içine alýar diýip, «autoevolution» neşiri habar berýär.
Esasy üýtgeşmelere «Metal Oxide» atly täze kuzow reňki degişlidir. Ony iki reňkli görnüşler bilen utgaşdyryp bolýar. Awtoulagyň öňdäki radiator gözenegi we yzky bamperi kuzowyň reňkinde boýalan. 19 dýuýmlyk tigirlerde bolsa ýalpyldamaýan çal reňk ulanylan. Salonyna emeli deri we zamş materialy bilen örtülen, «Bordeaux Red» (goýy gyzyl) reňkde oturgyçlar ýerleşdirilen. Şeýle-de ulagda panoramaly üçek we 64 dürli reňk bilen sazlanýan içki yşyklandyryş ulgamy bar.
«High Hero» modeli üç görnüşdäki gibrid hereketlendiriji bilen hödürlenýär: 1,8 litrlik gibrid hereketlendiriji (140 a.g.), 2,0 litrlik Hybrid 200 we Plug-in Hybrid 220. Bu görnüşleriň ählisi «Toyota Safety Sense» atly iň täze howpsuzlyk ulgamy bilen üpjün edilýär.
Şeýle-de Toyota «C-HR GR Sport Premiere Edition» modelini hem täzeledi. Bu görnüşde 20 dýuýmlyk tigir diskleri, sport stilindäki oturgyçlar we kämilleşdirilen JBL ses ulgamy bar.
Täze görnüşleriň ählisi Ýewropada eýýäm satuwa çykdy.
