20-nji fewralda altyn üçin birža bahalary bir unsiýa üçin 2970 dollardan geçip, rekordy täzeledi. Bu Çikagonyň söwda biržasynyň maglumatlaryndan gelip çykýar. Iň ýokary derejesinde fýuçersleriň bahasy 2973,4 dollara ýetdi.
Altyn üçin bahalar ýylyň başyndan bäri eýýäm onunjy gezek rekordy täzeleýär diýip, Reuters belleýär. Öňki rekord 11-nji fewralda goýlupdy. Ýylyň başyndan bäri bu metal 12% gymmatlady.
Agentlik bahalaryň ABŞ-nyň Prezidenti Donald Trampyň salgyt girizip bilmek ähtimallygynyň netijesinde ýokarlanýandygyny belleýär.
Citigroup analitikleri fewral aýynyň başynda altynyň bahasynyň geljek üç aýyň dowamynda bir unsiýa üçin rekord 3000 dollara ýetip biljekdigini çaklady. Şeýle-de, olar 2025-nji ýylda altynyň ortaça bahasy baradaky çaklamalaryny 100 dollar, bir unsiýa üçin 2900 dollara çenli ýokarlandyrdy.
Bütindünýä altyn geňeşiniň (World Gold Council) hasaplamalaryna görä, dünýäde altyna bolan isleg rekord derejä ýetdi, ol ýylyň dowamynda 1% ýokarlanyp, 4974 tonna ýetdi. Şeýle-de, 2024-nji ýylda altynyň bahasy 40 gezek rekordy täzeledi, bir ýylda altynyň bahasy 27% ýokarlandy. Analitikler gymmat bahaly metala şeýle ýokary islegi merkezi banklar tarapyndan durnukly satyn alyş we maýa goýum isleginiň ýokarlanmagy bilen baglanyşdyrýar.
