Apple öz tehnologiýalarynyň ösüşi babatda möhüm ädim ätdi. Uzak ýyllaryň dowamynda amala aşyran işleriniň netijesinde, kompaniýa ilkinji 5G-modemini döretdi. Ol «C1» diýlip atlandyryldy. Täze modem ykjam enjamlar üçin niýetlenip, ol häzirki wagtda iPhone modelleriniň hemmesinde diýen ýaly ulanylýan Qualcomm modemleriň ornuny tutar.
C1 ornaşdyrylan ilkinji enjam iPhone 16e boldy. Bu täze we arzan bahaly model iPhone SE seriýasynyň ornuny tutar.
«Apple kompaniýasy C1 bilen kremniýniň mümkinçiliklerini giňeldýär. C1 dolulygyna Apple tarapyndan işlenip taýýarlanan ilkinji modemdir. Ol iPhone modellerinde häzirki wagta çenli ulanylan iň energiýa tygşytlaýjy modemdir. Ol 5G torlaryna çalt we durnukly birikmegi üpjün edýär. Apple çipleri, şol sanda C1 modemi, düýbünden täze içki dizaýna eýedir. Ol iOS 18 operasion ulgamynyň ösen energiýa dolandyryşynyň mümkinçiliklerinden peýdalanýar we enjamyň işleýiş wagtyny ajaýyp derejede uzaldýar» — diýip, Apple resmi beýannamasynda belläp geçdi.
Apple-yň öz modemlerine geçmeginiň esasy sebäpleriniň biri - Qualcomm kompaniýasyna tölenýän ygtyýarnama töleglerini azaltmak bolup biler. Beýleki bir sebäbi bolsa, C1-iň energiýa tygşytlaýjy aýratynlygydyr.
9to5Mac portalynyň ýazmagyna görä, Apple öňki nesil iPhone modellerinde hem Intel, hem Qualcomm modemlerini ulanýardy. Ulanyjylar Qualcomm modemlerini has gowy gördüler. Şondan soň Intel öz modem bölümçesini Apple-a satdy.
Modem öndürmek Apple üçin täze bir ugur hasaplanýar. Şol sebäpden C1 ilkinji bolup arzan bahaly iPhone 16e modellerinde synagdan geçirilýär. Flagman modelleri bolan iPhone 16 we iPhone 16 Pro-da häzirlikçe Qualcomm modemleri ulanylýar.
