“Real”, “PSŽ”, Dortmundyň “Borussiýasy” we “PSW” Çempionlar ligasynyň 1/8 finalyna çykdy

  • 20.02.2025 11:38
  • 10k+

UEFA-nyň Çempionlar ligasynyň pleý-off tapgyrynyň esasy duşuşygynda Madridiň “Realy” “Mançester Sitiden” üstün çykdy. Madrid şäherindäki “Santýago Bernabeu” stadionynda geçirilen toparlaryň arasyndaky jogap oýny 3:1 hasabynda tamamlandy. Angliýadaky ilkinji duşuşyk hem madridlileriň peýdasyna 3:2 hasabynda tamamlanypdy.

Topar üçin üç goluň ählisini Killian Mbappe geçirdi. Ol Madrid kluby üçin ikinji het-trigini amala aşyrmak bilen, Ispaniýa gelenden soň özüniň iň gowy oýnuny görkezen bolsa gerek.
Hosep Gwardiolanyň toparyna diňe esasy wagta goşulan minutlarda uly ýeňlişden sypmak başartdy. Ahyrky 3:1 hasaby-da uly ýeňiş diýip atlandyryp bolmaz, ýöne barybir “ManSiti” ýeňliş duýgusyndan gaçyp bilmedi.
“Real” bilen bilelikde 1/8 finala Dortmundyň “Borussiýasy”, “PSŽ” we “PSW” hem çykdy.
Fransiýanyň “PSŽ” kluby geçen hepde myhmançylykda “Bresti” 3:0 hasabynda utandan soň, bu gezek öýünde ýedi jogapsyz gol bilen ony derbi-dagyn etdi. Ýedi goluň ählisi-de dürli oýunçy tarapyndan salyndy. Ýagny, gollary öz hasabyna Bredli Barkol, Hwiçi Kwarasheliýa, Witinýa, Dezire Due, Nunu Mendeş, Gonsalu Ramuş we Senni Meýulýu ýazdy. Iki duşuşygyň jemi boýunça umumy hasap – 10:0.
Dortmundyň “Borussiýasy” hem indiki tapgyra kynçylyksyz geçdi. Ol “Sportingi” birinji oýunda 3:0 hasabynda utdy. Jogap oýny deňme-deňlikde gutardy – 0:0.
Eýndhowenden “PSW” bilen Turiniň “Ýuwentusynyň” duşuşygynda welin, ýiti göreş gitdi. Myhmançylykda 1:2 hasabynda utulan niderlandly topar ikinji ýarymyň başynda Iwan Perişiçiň takyk urgusy bilen hasaby açdy. Timoti Wea tiz wagtdan hasaby deňledi, ýöne “Ýuwentusa” hasaby saklamak başartmady: Ismael Salibari “PSW-ni” öňe çykardy. Oýun goşmaça wagtda dowam etdi we netijede “PSW” Raýan Flamingonyň goly bilen ýeňiş gazandy. “Ýuwentus” bu tapgyrda ýaryşy terk eden üçünji italýan topary boldy.
Şeýlelikde, Çempionlar ligasynyň 1/8 finalyna gatnaşyjylaryň ählisi belli boldy. Indiki tapgyrda pleý-off oýunlarynyň ýeňijilerine umumy tapgyryň ilkinji sekiz topary goşular: “Liwerpul”, “Barselona”, Londonyň “Arsenaly”, Milanyň “Interi”, Madridiň “Atletikosy”, Lewerkuzeniň “Baýeri”, “Lill” we Birmingemiň “Aston Willasy”.
Anna güni, 21-nji fewralda bije çekişigi geçirilip, finala çenli ýaryşyň tertibi kesgitlener. Çempionlar ligasynyň oýunlary bolsa 4-nji martda başlar.


düýn 12:10
5.6k+

«Arkadag» FK bassyr üçünji ýyl wagtyndan öň Türkmenistanyň çempiony boldy

«Arkadag» futbol kluby bassyr üçünji ýyl wagtyndan öň Türkmenistanyň futbol çempionatynyň ýeňijisi boldy. Çempionatyň nobatdaky tapgyrynda Aşgabatda geçirilen duşuşykda “Arkadag” “Ahal” toparyndan 1:0 hasabynda üstün çykdy...

düýn 09:55
9.6k+

"Real" soňky bir ýarym ýylda ilkinji gezek "Barselonadan" üstün çykdy

Madridiň «Realy» Ispaniýanyň çempionatynyň 10-njy tapgyrynda öz meýdançasynda «Barselonany» 2:1 hasabynda ýeňdi. Bu duşuşyk futbol taryhynda 262-nji «El-klasiko» boldy. Duşuşygyň eýýäm 2-nji minutynda katalonlylaryň derwezesine penalti bellenildi, emma soňra bu karar ýatyryldy...

26.10.2025 18:26
8k+

Lionel Messi “Altyn butsy” aldy we MLS-de gol boýunça rekord goýdy

“Inter Maýaminiň” hüjümçisi Lionel Messi MLS-iň yzygiderli möwsüminiň iň gowy bombardiri hökmünde “Altyn butsy” aldy. 38 ýaşly argentinaly oýunça baýrak pleý-offuň 1/8 finalynyň “Neşwill” bilen oýnundan öň gowşuryldy...

26.10.2025 18:23
4.9k+

“Barselona” Uber bilen hemaýatkärlik şertnamasyny baglaşdy

“Barselona” futbol kluby taksi gözlemek we sargyt etmek boýunça Uber hyzmaty bilen hyzmatdaşlygyň başlandygyny habar berdi. Şertnama 2027-nji ýyla çenli hereket eder we Mundo Deportivo neşiriniň maglumatlaryna görä, kluba ýylda, takmynan, 1 mln ýewro getirer...