Günorta Koreýa milli hasaplaýyş merkeziniň işi üçin 10 müň sany hasaplama tizleşdirijisini (GPU) satyn almak isleýär. Merkez emeli aň pudagynda meseleleri çözmegiň üstünde işlär. Bu barada Respublikanyň Prezidenti Çhwe San Moka salgylanyp, Reuters agentligi habar berýär.
“EA pudagynda agalyk etmek üçin bäsdeşligiň güýçlenmegi bilen, bäsdeşlik landşafty kompaniýalaryň arasyndaky gapma-garşylykdan milli innowasiýa ekoulgamlarynyň arasyndaky doly bäsdeşlige geçýär” – diýip, Prezident aýtdy.
Ol GPU-ny şu ýylyň sentýabr aýyna çenli hususy-döwlet hyzmatdaşlygynyň çäklerinde satyn almagyň meýilleşdirilýändigini sözüniň üstüne goşdy.
Reuters maglumat tehnologiýalary pudagynda bäsdeşligiň kompaniýalaryň däl-de, barha ýurtlaryň arasyndaky bäsdeşlige öwrülýändigini belleýär. Mundan öň EA bilen baglanyşykly taslamalara milliardlarça dollarlyk maýa goýumlar barada ABŞ we Fransiýa habar berdi.
Tizleşdiriji bilen üpjün etjek takyk kompaniýa heniz yglan edilmese-de, ähtimal, bu dünýäniň GPU bazarynyň, takmynan, 80%-ini eýeleýän Nvidia kompaniýasynyň önümleri bolup biler. Günorta Koreýanyň ABŞ-dan ösen hasaplaýyş tizleşdirijilerini çäklendirmesiz satyn almaga mümkinçiligi bar, bu hem ýurda bäsdeşlik artykmaçlygyny berýär.
