Kia kompaniýasy «IDEX 2025» sergisinde ilkinji pikap ulagy bolan Tasman-y resmi taýdan tanyşdyrdy. Mundan öň sedanlary we krossowerleri bilen tanalýan brend indi model hataryny giňeldýär diýip, «32Cars.ru» habar berýär.
Kia Mohave ulagyndan ylham alnyp işlenip düzülen Tasman, kyn şertlerde sürmek üçin niýetlenendir. Ol hem işde ulanmaga, hem-de dynç alyş üçin amatlydyr. Pikabyň dizaýny batyrgaý, şol bir wagtda hem, ýönekeý. Giň radiator gözenekli ulag dokuz dürli reňkde hödürlenýär.
Tasman-yň salony ýokary hilli enjamlar bilen üpjün edilen. Ulag 12,3 dýuýmlyk ekran we Harman Kardon ses ulgamy bilen enjamlaşdyrylan. Apple CarPlay we Android Auto ulgamlaryny goldaýar. Şeýle-de rahatlyk üçin eplenýän konsollar we gizlin saklaýyş bölümleri bar.
Tasman üç görnüşde hödürlener: standart double cab, şeýle-de ýolsuz ýerler üçin niýetlenen X-Line we X-Pro. Pikabyň satylýan ýerine baglylykda dürli hereketlendirijiler we dört dürli ýük platformasy konfigurasiýasy elýeterli bolar.
Kia Tasman-yň satuwyna 2025-nji ýylyň başynda Günorta Koreýada başlanar. Ondan soň pikap Awstraliýanyň, Afrikanyň we Ýakyn Gündogaryň bazarlaryna çykarylar.
