Plates London restorany Mişlen baýragynyň taryhynda ýyldyz alan ilkinji wegan restorany (haýwan etini iýmit hökmünde ulanmazlyk) boldy. Ýyldyz Mişlen gollanmasynyň 125 ýyllygy mynasybetli Glazgoda geçirilen dabarada gowşuryldy diýip, The Independent neşiri habar berýär.
Bu dabarada 22 sany täze restoran özüniň ilkinji Mişlen ýyldyzyny aldy: dokuz sanysy Londonda, üçüsi Irlandiýada we ikisi Şotlandiýada. Şeýle-de, Kardiff şäheri ilkinji ýyldyzyny aldy, bäş sany Ýaşyl ýyldyz bolsa durnukly ösüş ýörelgelerine ygrarly bolan restoranlara berildi.
Plates-iň şef-aşpezi we ony esaslandyryjylaryň biri Kirk Hawort ilkinji gezek wegan berhizini 2016-njy ýylda özünde Laýma keseli ýüze çykarylandan soň öwrenip başlady. Ol klassyky tagamlary alyp, olary öz saglygynyň zerurlyklaryna görä “döredijilikli” laýyk getirdi.
Plates restoranynda et, balyk, glýuten, süýt önümleri we arassalanan şeker bolmadyk organiki menýu hödürlenýär.
“Trend” sözi – bu gelýän we gidýän zat, ýöne meniň edýän zadym we ony döretmek üçin ulanýan ýerim, trend däldir. Men bu has köp restoranlary miwelere we gök önümlere ünsi jemläp, olara döredijilikli çemeleşmäge ruhlandyrar diýip umyt edýärin” – diýip, Hawort The Independent neşiri bilen söhbetdeşlikde aýtdy.
Hawort üçin bir Mişlen ýyldyzy – bu “diňe başlangyjy”. Ol restoran üçin iň ýokary baýrak bolan üç ýyldyzy almagy maksat edinýär.
