Alymlar haýwanlaryň ýüz keşbinden olaryň stresini, agyrysyny ýa-da kynçylyk çekip-çekmeýändigini anyklamagy başarýan emeli aň (EA) ulgamlaryny işläp düzdüler. Olaryň pikirine görä, bu innowasiýa weterinar lukmançylygyny kämilleşdirer we haýwanlaryň rahatlygyny ýokarlandyrar. Bu ugurda şol bir wagtda birnäçe taslama işlenip düzülýär diýip, «TechCrunch» neşiri habar berýär.
Beýik Britaniýada «Intellipig» atly algoritm döredildi. Ol doňuzlaryň özüni oňaýsyz duýup-duýmaýandygyny kesgitläp bilýär. Algoritm doňuzlaryň suratlaryny seljerýär we agyry ýa-da näsaglyk baradaky alamatlary kesgitleýär. Eger bir mesele ýüze çyksa, çopanlara bildiriş iberilýär. Netijede, haýwanlara öz wagtynda ideg edilýär.
Ysraýylly alymlar itleriň duýgularyny seljermek üçin ýüz tanamak tehnologiýasyny üýtgedip uýgunlaşdyrdylar. Barlaglaryň netijelerine görä, itleriň ýüz hereketleriniň 38%-i adamlaryňka meňzeýär. Täze algoritmi kämilleşdirmek üçin, öň ýitirim bolan öý haýwanlaryny tapmak üçin ulanylan ulgamlardan peýdalanyldy.
Braziliýada EA atlaryň agyrysyny anyklamakda 88% takyklyk görkezdi. Alymlar bu tehnologiýany döretmek üçin atlaryň suratlaryny seljerdiler. Olar operasiýadan öň we soň düşürilen, şeýle-de agyryny gowşadýan derman kabul eden atlaryň şekillerini deňeşdirdiler. Netijede, EA göz, gulak we agyz bilen bagly agyrylary 88% takyklyk bilen kesgitlemegi başardy.
