Londonda täze 32 gatly ofis binasynyň gurluşygyna taýýarlyk wagty arheologlar köpçülikleýin ýygnaklar we kazyýet diňlenişikleri üçin ulanylan ilkinji Rim bazilikasynyň galyndylaryny tapdy. Gazuw-agtaryş işleri biziň günlerimize çenli saklanyp galan binýatlary we diwarlary ýüze çykardy. Bu açyş barada Londonyň Arheologiýa muzeýiniň (MOLA) resmi saýtynda habar berilýär.
Bu bazilika, takmynan, b.e. 70-80-nji ýyllarynda gurlup, Rim forumynyň – administratiw we sosial merkez Londiniumyň bir bölegi bolupdyr.
Gazuw-agtaryş işleri ilkinji bazilikanyň keramiki plitalaryň, kremniniň we daşlaryň garyndysyndan gurlandygyny görkezdi. Käbir ýerlerde uzynlygy 10 metre çenli ýetýän diwarlar saklanyp galypdyr we olar, ähtimal, iki ýa-da üç gatly binany saklan bolsa gerek. Bu bazilika, takmynan, futbol meýdançasynyň ululygyndaky meýdany eýeläpdir.
Ýöne bazilika bary-ýogy ýigrimi ýyl ulanylyp, soňra has uly forum bilen çalşylypdyr.
Hünärmenleriň pikiriçe, tapylan galyndylar rimli kazylar tarapyndan hukuk meselelerini çözmek, syýasy liderler tarapyndan bolsa Rim şäheri Londiniumy dolandyrmak babatda çözgütleri kabul etmek üçin ulanylan bazilikanyň tribunaly bolsa gerek.
Gurluşyk meýdançasyna eýeçilik edýän we täze edarany gurmak üçin ygtyýarnamasy bolan Hertshten Properties kompaniýasy gadymy galyndylary binanyň taslamasyna goşmak we olary myhmanlar üçin jemgyýetçilik merkezinde görkezmek kararyna geldi.
Belläp geçsek, Londinium rimliler tarapyndan, takmynan, b.e. 43-nji ýylynda esaslandyrylypdyr. Ol II asyryň ahyryndan V asyra çenli Rim Britaniýasynyň söwda we häkimiýet merkezi bolupdyr. Londinium Temza derýasynda, häzirki Londonyň ýerleşýän ýerinde ýerleşipdir.
