Braziliýaly 105 ýaşly Manoel Angelim Dino we 101 ýaşly Mariýa de Souza Dino häzirki wagtda ýaşaýan jübütleriň arasynda iň uzak dowam eden nika rekordyny goýdular. Olar 84 ýyl 80 gün bäri bile ýaşaýarlar. Bu barada Ginnesiň rekordlar kitaby habar berýär.
Manoel bilen Mariýa ilkinji gezek 1936-njy ýylda tanşypdyrlar. Şol döwürde olaryň ikisem daýhançylyk bilen meşgullanýan eken. Manoel bir gün Braziliýanyň naýbaşy süýjüsi bolan rapadura (panela) almak üçin Mariýanyň şäherine barýar. Olar şol wagt ilkinji gezek gabatlaşýarlar, emma düşünişip bilmeýärler.
Soň aradan birnäçe ýyl geçýär. Olar tötänlik bilen 1940-njy ýylda ýene gabatlaşýarlar. Bu gezek Manoel Mariýany duşuşyga çagyrýar we şol ýylyň özünde olar durmuş gurýarlar. Olar ýaşamak üçin Manoeliň öz eli bilen guran öýüne göçüp barýarlar we gazanç etmek üçin söwda bilen meşgullanyp başlaýarlar.
Uzyn ömürleriniň dowamynda olar 13 çagany terbiýeläp ulaldypdyrlar. Çagalary bolsa olara 55 agtyk, 54 çowluk we 12 ýuwluk sowgat beripdir. Nikaňyzyň uzak dowam etmeginiň syry nämede diýlip soralanda, Mariýa gysgaça jogap berýär: «Söýgi».
Häzirki wagtda Manoel ýaşy sebäpli, gününiň köp bölegini dynç almak bilen geçirýär. Şeýle-de bolsa ol agşamlaryna myhman otagda Mariýa bilen bilelikde radiodan doga diňleýär. Soň bolsa telewizorda dini ybadatlara syn edýär.
Manoel bilen Mariýa «häzirki wagtda ýaşaýan är-aýallaryň arasynda» iň uzak dowam eden nikanyň rekordyna eýe bolsalar-da, absolýut rekord olaryňky däl. Bu rekord kanadaly Dewid Jeýkob Hiller bilen Sara Dewi Hillere degişlidir. Olar 88 ýyl 349 gün bile ýaşadylar. Olaryň nikasy 1898-nji ýylda Sara aradan çykanda tamamlandy.
