Ýanwar aýynyň jemi boýunça Ýewropada we ABŞ-da elektromobil hem-de zarýad alýan gibridleriň (PHEV) satuw möçberiniň ösüşi bu sebitlere geçen ýylyň fewral aýyndan bäri ilkinji gezek Hytaýdan öňe geçmäge mümkinçilik berdi. Bu barada Rho Motion kompaniýasynyň analitikleri habar berýär.
Ýanwar aýynda dünýäde şeýle ulaglaryň satuw möçberi geçen ýyl bilen deňeşdirilende 18% ýokarlanyp, 1,26 mln birlige ýetdi.
Hytaýda Täze ýyl mynasybetli dynç alyş günleri sebäpli elektrik hereketlendirijili ulaglaryň satuwy dekabr aýy bilen deňeşdirilende 43% azaldy. Ýöne geçen ýylyň ýanwar aýyna garanda Hytaýda satuw möçberi 11,8%, 700 müň birlige çenli ýokarlandy.
Ýewropada ösüş geçen ýyl bilen deňeşdirilende 21% boldy we sebitde ýanwar aýynyň jemi boýunça 25 000 elektromobil we zarýad alýan gibrid satyldy. Fransiýada zarýad alýan gibridlere salgytlaryň girizilmegi umumy satuwyň 52% pese gaçmagyna getirdi, Germaniýada bolsa ýyllyk hasabynda 40% ýokarlandy.
Dünýä derejesinde elektromobil we zarýad alýan gibridleriň satuw möçberi eýýäm üç aý bäri ösüş depgininiň peselýändigini görkezýär. ABŞ-da we Kanadada satuw möçberi 22,1%, 130 000 birlige çenli ýokarlandy. Ýanwar aýynyň jemi boýunça galan ýerlerde satuw 50% ýokarlandy. Aýlyk hasabynda global satuw 35% pese gaçdy.
