«Forsaž» franşizasynda Dominik Torettonyň keşbini ýerine ýetirýän aktýor Win Dizel final bölümiň surata düşürilşine degişli wideorolik paýlaşdy. Wideoda final bölümde ulanylmagy çaklanylýan, «Forsažyň» birinji bölümindäki birnäçe ulagy görmek bolýar. Franşizanyň on birinji filmi hasaplanýan «Forsaž 10: Ikinji bölüm» (Форсаж 10: Часть 2) atly taslamanyň premýerasy 2026-njy ýylyň mart aýyna meýilleşdirilýär. Bu barada «Auto.ru» portaly ýazýar.
Win Dizel franşizanyň tamamlanandygyny, dogduk mekanyna – Los-Anjeles şäherine gaýdyp gelendigini we surata düşüriş işleriniň şol ýerde dowam edýändigini belläp geçdi. Wideoda gara reňkli «Honda Civic» kupeleriniň hatary görkezilýär. Ýatlatsak, Torettonyň topary bu ulaglar bilen «Forsažyň» birinji bölüminde iri ýük ulaglaryny talapdylar.
Wideoda franşizanyň simwolyna öwrülen masl-kar görnüşli «Chevrolet» awtoulaglary, şeýle hem täze nesil «Toyota Supra», ýaşyl reňkli meşhur «Mitsubishi Eclipse» we Win Dizeliň münýän «Mazda RX-7» kysymly ulagyny görmek bolýar.
«Forsaž 10: Ikinji bölüm» filminiň temasy barada häzirlikçe hiç hili maglumat berilmeýär. Şeýle-de bolsa meşhur gahrymanlaryň keşplerini ýerine ýetirýän artistleriň ählisiniň diýen ýaly bu filmdäki keşplerini hem ýerine ýetirjekdigi mälim boldy: Win Dizel we Mişel Rodrigesden başlap, Jeýson Steýtem we Ludakrise çenli. Filmde Jeýson Momoa hem bir keşbi ýerine ýetirer.
Soňky filmiň režissýory hökmünde «Forsaž 10» filmini surata düşüren Lui Leterýe çykyş eder.
