Aşgabatdan 25 ýaşly halkara sport ussady Saparmyrat Atabaýew Daşkentde geçirilen 2-nji «AL-BERUNIY» (Futures) halkara küşt ýaryşynda ýeňiji boldy. Bu barada Türkmenistanyň Küşt federasiýasy habar berýär.
Ýaryş nusgawy wagt gözegçiligi bilen aýlawly ulgam boýunça geçirildi. Oňa Özbegistandan, Hindistandan, Russiýadan, Şwesiýadan, Belarusdan hem beýleki ýurtlardan grossmeýsterler gatnaşdy.
Dokuz tapgyryň netijesi boýunça FIDE reýtingi 2516 bolan Saparmyrat Atabaýew 7 utuk toplady. Şonça utugy hindi grossmeýsteri Pa Iniýan-da (FIDE reýtingi 2523) toplady. Şeýle-de bolsa, aýgytly arakesmede ol S.Atabaýewden utuldy we netijede ikinji ýeri eýeledi. 6,5 utuk toplan Belarus grossmeýsteri Mihail Nikitenko (FIDE reýtingi 2512) iň ökde üçlügiň soňkusy boldy.
Bu ýaryşda gazanan ýeňşi Saparmyrat Atabaýewe 3500 ABŞ dollary möçberinde pul baýragyny almaga we Halkara grossmeýster derejesiniň berilmegi üçin zerur iň soňky (üçünji) normany ýerine ýetirmäge mümkinçilik berdi. Resmi karar Halkara küşt federasiýasynyň geňeşiniň (FIDE) mejlisinde kabul ediler.
Ýatlatsak, Saparmyrat 2023-nji ýylyň iýunynda Duşenbe şäherinde geçirilen Dünýä Kubogynyň Merkezi Aziýa zolaklaýyn ýaryşynda iň güýçli üç küştçiniň hataryna girdi we şol ýylyň dekabrynda Daşkentde geçirilen «Castle-2023 Masters» küşt festiwalynda ýeňiji boldy. Geçen ýyl bolsa ol Türkiýede geçirilen 33 ýyllyk «Ak pil» saýlama ýaryşynyň ýeňijisi boldy.
Saparmyrat Atabaýewiň şu güne çenli ilkinji tälimçisi we halypasy Türkmenistanyň at gazanan tälimçisi Aýdogdy Atabaýew.
