Ýaz paslynda satuwa çykarylmagy meýilleşdirilýän täze «Nissan N7» sedan modeli DeepSeek emeli aň (EA) kömekçisi bilen enjamlaşdyrylýar. Bu model Hytaý bazarynda daşary ýurtly brendleriň arasynda bu tehnologiýany ornaşdyrýan ilkinji elektrikli awtoulag bolup durýar. «N7» modeliniň önümçiligini Nissan bilen Dongfeng-iň bilelikdäki kärhanasy amala aşyrar diýip, «Cnevpost» neşiri habar berýär.
Resmi maglumatlara görä, DeepSeek-iň maglumatlary işlemek we özbaşdak öwrenip bilmek ukyby ulanyjynyň niýetini has takyk kesgitlemäge hem-de adamlar bilen elektronikalaryň arasyndaky gatnaşyklary has tebiga ýakyn edip alyp barmaga mümkinçilik berer. Bu aýratynlyklar ilkibaşda sesli kömekçä, şeýle-de nawigasiýa ulgamyna we media mazmunlaryna degişli bolar.
Mundan öň hem «Nissan N7» modelinde ýene bir öňdebaryjy tehnologiýanyň – «Momenta» startapynyň sürüji kömekçi ulgamynyň ulanyljakdygy habar berlipdi. Bu tehnologiýa esasynda elektroniki dolandyryşdaky «N7» diňe bir awtoýollarda däl-de, eýsem şäherleriň içinde hem «özbaşdak» hereket edip biler.
Şeýle-de mundan ozal hem käbir öňdebaryjy hytaýly awtoulag öndürijileri DeepSeek neýrotoruny öz awtoulaglarynyň bort elektronikasynda ulanmak baradaky meýilnamalaryny mälim edipdiler. Dongfeng-den başga-da bu brendleriň hataryna BYD, Zeekr, Smart we Leapmotor girýär.
Hytaýyň daşyndaky bazarlarda bolsa bu tehnologiýa örän seresaplylyk bilen garalýar: mysal hökmünde aýtsak, Hyundai/Kia bileleşigi öz işgärleriniň DeepSeek-e bolan elýeterliligini çäklendiripdi.
«Nissan N7» modeliniň doly tehniki häsiýetnamasy onuň bazara çykmazynyň öň ýanynda mälim ediler. Häzirki wagta çenli bar bolan maglumatlara görä, sedanyň uzynlygy 4930 millimetr, tigir bazasy bolsa 2915 millimetr bolup, ol 218 ýa-da 272 at güýjünde işleýän elektrikli hereketlendiriji bilen üpjün ediler. Awtoulag bir gezeklik doly zarýady bilen 620 kilometre çenli ýol geçip bilýär.
