Indi «Başlat» (Start) menýusynda gerek bolan programmalary tapmak has aňsat we tiz bolar. Täzelenen menýu Windows 11 ulanyjylary üçin 2025-nji ýylyň dowamynda elýeterli bolar diýip, «Windows Latest» neşiri habar berýär.
«Windows Latest» neşiriniň habaryna görä, Windows 11-iň soňky «Build 22635.4805» belgili wersiýasynda «Başlat» menýusyna birnäçe gyzykly we peýdaly aýratynlyklar goşuldy. Kän bir uly üýtgeşmeler ýok, ýöne indi gurnalan programmalary görmek üçin üç dürli režim bar: adaty sanaw (häzirki ýaly), atlar boýunça tertiplenen gözenekleýin görnüş we programmalary kategoriýalara bölüp, kiçi bukjalara ýerleşdirmek mümkinçiligi.
Täzelenme programmalary maksatlaryna görä toparlara bölmäge mümkinçilik berýär. Mysal üçin, olary ulgamy dolandyrmaga degişli programmalar, mazmun döretmek üçin niýetlenen programmalar we ş.m. ýaly aýratyn toparlara bölüp bolýar. Programmalaryň nyşanyna basylsa degişli programma açylar, kategoriýanyň (kiçi bukjanyň) adyna basylanda bolsa şol toparda ýerleşýän ähli programmalar görner.
Täzelenen «Başlat» menýusynda tertiplemek funksiýasy emeli aň (EA) arkaly işleýär. EA operasion ulgamda bar bolan programmalaryň atlaryny, meta-maglumatlaryny derňeýär we bar bolan maglumat çeşmeleri bilen deňeşdirip, olary degişli kategoriýalara ýerleşdirýär. «Kategoriýalar» bölümindäki animasiýalaryň we geçiş hereketleriniň hiç hili doňman we yza galman işleýändigi bellenip geçilýär.
Täzelenen «Başlat» menýusy resmi taýdan Microsoft Build 2025 çäresinde görkeziler. Çäre 19-22-nji maýda ABŞ-nyň Sietl şäherinde geçiriler.
