Britan Antarktika gullugynyň (BAS) ylmy gözlegçileri Antarktidanyň uzak ýerlerindäki garda ilkinji gezek mikroplastik tapdy. Union we Schanz buzluklaryndan alnan nusgalaryň seljermesi garyň eremegine we ýerli ekoulgama täsir edip biljek hapalaýjy bölejikleriň ýokary konsentrasiýasyny görkezdi diýip, Daily Mail habar berýär.
Ylmy gözleg bir litr garda 73-den 3099-a çenli plastik mikrobölejikleriniň saklanýandygyny görkezdi.
Bu bölejikleriň köpüsi 50 mikrometrden kiçi ululyga eýedi, bu bolsa adam öýjükleriniň ululygy bilen deňleşýär. Muňa garamazdan, gözlegçi Emili Roulendsiň aýtmagyna görä, bu nusgalardaky mikroplastik konsentrasiýasy öňki ylmy gözleglere garanda 100 esse ýokary bolup çykdy.
BAS-yň hünärmeni Klara Manno hapalanmagyň çeşmesiniň meýdan lagerlerindäki materiallaryň: egin-eşikleriň, ýüpleriň, signal baýdaklarynyň bolup biljekdigini çaklaýar.
Alymlar poliamid, polietilentereftalat, polietilen we sintetik kauçuk ýaly birnäçe plastik görnüşini ýüze çykardy.
Şeýle-de, ylmy gözlegçiler mikroplastigiň garyň eremegini tizleşdirip biljekdigini, onuň bölejikleriniň bolsa eýýäm ýerli jandarlaryň – pingwinleriň, düwlenleriň we balyklaryň organizminde tapylandygyny belleýär.
