2025-nji ýylyň ahyryna çenli dünýäniň iň uly aýsbergi hasaplanan A23a buzlugy öz «ýaşaýşyny» bes etdi diýen ýaly. Bu barada Arktika we Antarktika ylmy-barlag instituty habar berdi.
Institutyň maglumatlaryna görä, aýsberg ownuk böleklere bölünip, ilkibaşdaky meýdanynyň 99%-ini ýitirdi.
«Ýanwar aýynda aýsbergiň meýdany, takmynan, 1300 inedördül kilometrdi. Häzirki wagtda onuň meýdany 50 inedördül kilometrden hem az — diýip, Institutyň Buz we gidrometeorologik maglumatlar merkeziniň baş hünärmeni Polina Soloşuk gürrüň berdi. — Häzirki wagtda A23a aýsbergi arassa suwda ýüzmegini dowam etdirýär we göni gözüň öňünde böleklere dargaýar».
Soňky üç aýyň dowamynda aýsberg, takmynan, bir müň kilometr ýol geçip, Günorta we Atlantik ummanlarynyň serhedinden geçdi. Häzirki wagtda ol günorta giňliginiň 49-njy paralleliniň töwereginde ýerleşýär.
«A23a aýsbergi tükendi» - diýlip, Institutyň Telegram kanalynda bellenilýär.
Aýsberg 1986-njy ýylda Antarktidadaky Filhner şelf buzlugyndan bölünip aýryldy. Şol wagt onuň meýdany 4170 inedördül kilometr bolup, bu görkeziji Aşgabadyň meýdanyndan, takmynan, 4,5 esse uludy.
30 ýyldan gowrak wagtlap ol Ueddell deňzinde ýalpaklykda durdy, soňra Antarktidanyň kenarýakasy boýunça hereket edip başlady. 2025-nji ýylyň başynda aýsberg ýene-de saýa batdy, awgust aýynda bolsa Günorta Georgiýa adasynyň golaýynda hereketini dowam etdirdi.
2025-nji ýylyň ahyryna çenli onuň meýdany 1370 inedördül kilometre çenli azaldy we şondan soň ol dünýäniň iň uly aýsbergi diýlip hasaplanmagyny bes etdi.
