Gresiýanyň parlamentiniň öňki başlygy, dolandyryjy “Täze demokratiýa” konserwatiw partiýasynyň agzasy Konstantinos Tasulas ýurduň täze Prezidenti saýlandy. Onuň dalaşgärligini premýer-ministr Kiriakos Misotakis öňe sürdi we parlamentiň deputatlary tarapyndan goldanyldy diýip, Vouli parlament teleýaýlymyna salgylanyp, TASS habar berýär.
Döwlet Baştutany wezipesine dört dalaşgär hödürlendi, ýöne Tasulas konstitusiýada göz öňünde tutulan ses bermegiň bäş tapgyrynyň dowamynda ýeňiş gazanmak üçin hakyky mümkinçiligi bolan ýeke-täk dalaşgärdi.
Häzirki döwlet Baştutany Katerina Sakellaropulunyň bu wezipede bäşýyllyk möhleti 13-nji martda gutarýar. Şol gün hem täze Prezidentiň kasam kabul edişi bolar.
2014-nji ýylda Tasulas Gresiýanyň medeniýet we sport ministri wezipesini eýeledi, 2019-njy ýyldan bäri üç gezek ýurduň parlamentiniň spikeri saýlandy.
Belläp geçsek, Gresiýada Prezident wezipesi, esasan, dabaraly häsiýete eýedir. Prezident Ýaragly güýçleriň Baş serkerdebaşysy bolup, dünýä arenasynda Gresiýa wekilçilik edýär, ilçiler bilen duşuşýar, şertnama baglanyşýar, ýöne onuň, meselem, kanuna gadaganlyk girizmäge ýa-da premýer-ministri wezipeden aýyrmaga hukugy ýokdur.
