Tesla kompaniýasy Şanhaýda akkumulýator batareýalarynyň önümçiligi boýunça täze zawody işe girizdi. Zawod 11-nji fewralda Megapack akkumulýatorlaryny öndürip başlady diýip, Sinhua agentligine salgylanyp, Reuters habar berýär.
Zawod Tesla-nyň Lingan sebitindäki elektromobil öndürýän zawodynyň golaýynda ýerleşýär. Täze zawod ilkibaşda ýylda 10 000 sany Megapack öndürer. Bu bolsa, takmynan, 40 gWt/sag energiýa deňdir. 2019-njy ýylda hödürlenen Megapack batareýalary öňki Powerpack 2 modeliniň ornuna geldi. Her bir akkumulýator 3 MWt/sag sygyma we 1,5 MWt kuwwata eýe bolup, bir sagadyň dowamynda, takmynan, 3600 öýi energiýa bilen üpjün etmäge mümkinçilik berýär.
Täze zawod akkumulýator batareýalaryny hem içerki bazar, hem eksport üçin öndürer. Megapack-yň önümçiligi Tesla-nyň energetika çözgütleriniň global bazarynda ornuny berkitmäge ýardam eder.
Ýatlap geçsek, Tesla-nyň uly energetika taslamalaryny durmuşa geçirmekde eýýäm tejribesi bar. 2017-nji ýylda kompaniýa 20 MWt kuwwatly we 80 MWt/sag sygymly litiý-ion akkumulýatorlarynyň esasynda dünýäde iň uly ätiýaçlyk energiýa saklaýyş desgasyny işe girizdi. Megapack-yň peýda bolmagy bilen, kompaniýanyň bu ugurda mümkinçilikleri ep-esli giňeldi.
