Şwesiýa sowuk howa şertleri, ýabany tokaýlary we ygtybarly ulaglary bilen meşhurdyr. Volvo hut şular ýaly gurşawda dynç almagy halaýanlar üçin niýetlenen täze «EX30 Cross Country» krossowerini resmi taýdan hödürledi. Bu barada «Top Gear» neşiri habar berýär.
Täze model ýerden artdyrylan beýikligi, has uly tekerleri we islege görä oturdylýan ýolsuz ýerler üçin niýetlenen 18 dýuýmlyk şinalary bilen tapawutlanýar. Doly hereketli ulgamy awtoulagy garly, palçykly we ýolsuz ýerlerde ynamly sürmäge mümkinçilik berýär.
Modeliň täzelenen dizaýnyna öňki we yzky gorag örtükleri hem-de giňeldilen teker arkalary degişlidir. Ulagyň kapoty Şwesiýanyň iň beýik dagy bolan Kebnekaýseniň topografik kartasy bilen bezelen. Salony bolsa ergonomiki çözgütler, zat saklamak üçin niýetlenen amatly nişler we ses arkaly dolandyrylýan «Google Built-in» bilen enjamlaşdyrylandyr.
Volvo kompaniýasynyň beýleki modelleri ýaly, «EX30 Cross Country» hem kämil howpsuzlyk ulgamlary bilen enjamlaşdyrylandyr. Ol awtomatiki gyssagly tormoz ulgamy, kör nokatlara gözegçilik, sürüjiniň ýadawlygyny barlamak, pyýadalar we welosiped sürýänler bilen heläkçilige uçramak howpuny duýdurmak ýaly aýratynlyklary öz içine alýar.
Ulagy satyn aljaklara «Cross Country Experience» toplumy hem hödürlenýär. Oňa üçegiň üstüne goýulýan ýük sebedi, ýolsuz ýerlerde sürmek üçin goşmaça abzallar we berkidilen basgançaklar degişlidir.
«Volvo EX30 Cross Country» 2025-nji ýylyň ahyrynda ABŞ bazarynda satuwa çykarylar.
