Perseverance mars roweri Marsdaky Ýezero krateriniň golaýyndan ozal tapylanlaryň hiç birine meňzemeýän dag jynsynyň nusgasyny tapdy. NASA-nyň alymlary ony Gyzyl planetanyň uzak geçmişini açyp biljek möhüm tapyndy hasaplaýarlar.
Kosmos gämisi 2,9 santimetr ölçegdäki adaty bolmadyk bu nusga “Kümüş dag” diýilýän ýerde duş geldi. Bu sebitdäki jynslar uly ylmy gyzyklanma döredýär, sebäbi olarda Marsyň ösüşiniň başlangyç döwürleri barada maglumatlar bolup biler. Barlagçylar olaryň milliardlarça ýyl ozal planetanyň asteroid ýa-da kometa bilen çaknyşmagy netijesinde planetanyň jümmüşinden üstki gatlagyna zyňylandygyny çaklaýarlar.
NASA-nyň hünärmenleri munuň Marsyň geologiki taryhynda dört milliard ýyldan gowrak dowam eden Noý döwrüne degişli ilkinji nusgadygyny aýdýarlar.
