ABŞ-da tejribelik geçip ýören işgär, taryhy kino arhiwinde gutulary tertipleşdirip ýörkä, tötänlikde Awraam Linkoln hakyndaky 100 ýyl öňki sessiz filmiň lentasyny tapdy. Bu lenta hemişelik ýitendir öýdülýärdi diýip, NBC habar berýär.
2024-nji ýylda tomusky tejribeligi üçin Lauro kinoarhiwine işe giren Den Martin, gazna gowşurylan köne filmleriň gutularyny tertipleşdirip ýördi. Olar onlarça ýyl bäri Long-Aýlenddäki ammarda ýatyrdy. Poslap giden demir gutularyň ýanynda bäş sany film lentasy bardy.
«Ol [Martin] geň galyp daş çykdy-da: “Jo, çyndan hem men bu ýerde aýratyn bir zat bardyr öýdýärin” diýdi. Ine tapmaçanyň tapylan bölegi. Amerikanyň ýiten kinosynyň tapmaçasy» diýip, arhiwiň eýesi Jo Lauro aýtdy.
Bu 16 millimetrlik lenta – «Linkolnyň ýüregi» atly sessiz filmiň ýeke-täk saklanyp galan nusgasydyr. Film 1915-nji ýylda Universal studiýasy tarapyndan çykarylypdy. Bu film ABŞ-nyň Kongress kitaphanasynyň kolleksiýasyna girýän, hemişelik ýiten hasaplanylýan 7 müň sessiz filmiň biridir.
«Linkolnyň ýüregi» filminiň režissýory we filmiň baş keşbini ýerine ýetiren – Golliwudyň meşhur režissýory Jon Forduň uly erkek dogany Frensis Forddyr. Kinoarhiwçi Eliot Kissilef filmi arassalap, sanly görnüşe geçirdi. Onuň pikirine görä, lentanyň möhürlenip saklanmagy we çüýremän galmagy uly bagtdyr.
