Apple geljek hepde 2022-nji ýyldan bäri ilkinji gezek býujet modelini täzeläp, iPhone SE-niň täze neslini çykarar. Bildiriş şüweleňsiz geçer, tanyşdyrylyş dabarasynyň deregine kompaniýa web sahypasynda metbugat habarnamasyny çap etmek bilen çäklener we enjam satuwa aýyň ahyryna çenli çykarylar diýip, Bloomberg habar berýär.
iPhone SE-niň häzirki nesli göz-görtele köne, sebäbi Face ID-ni goldamaýar, Home fiziki düwmesi bar we USB-C porty bilen enjamlaşdyrylmadyk.
Täze iPhone SE has uly displeýi we häzirki zaman A18 prosessoryny, şeýle hem Apple Intelligence emeli aň funksiýalary goldawyny alar. Şeýle hem onda Ýewropada satylmagyna mümkinçilik berýän USB-C porty bolar.
Bu smartfonda Apple-iň ilkinji gezek öz işläp düzen modemini ulanmagyna garaşylýar. Bu köpçülikleýin öndürilmedik önümde ony iş ýüzünde synap görmäge mümkinçilik berer. Bahasy häzirki (429 $) bilen deňeşdirilende ýokarlanar.
Bloomberg-iň wekili Mark Gurman ABŞ-nyň köne iPhone SE-niň ätiýaçlyklarynyň gutaryp barýandygyny habar berdi. Bu täze modeliň ýakyn wagtda çykjakdygyny görkezýär. Mundan başga-da, iPhone SE-niň täze neslinde ulanyjynyň amatly we ygtybarly tassyklanmagy üçin Face ID goldawy peýda bolar.
Täze iPhone SE-niň gelmegi Apple-iň satuwyny ýokarlandyryp biler, esasanam kompaniýanyň girdejisiniň 11 göterim azalýan ýeri bolan Hytaýda şeýle bolmagyna garaşylýar.
Şeýle hem indiki sişenbe güni Apple ýürek urgusyny ölçeýän datçikli PowerBeats Pro 2 gulaklyklaryny hödürlär. Kompaniýanyň ýakyn aýlardaky meýilnamalarynda M4 prosessorly täze MacBook Air, täze iPad we iPad Air modellerini çykmak meýilleşdirilýär. Ýylyň ahyryna täze iş stansiýalarynyň we displeýli akylly öý enjamlarynyň tanyşdyrylyşyna garaşylýar.
