OpenAI öz firma stilini has “sazlaşykly we janly” etmek üçin rebrending geçirdi. Üýtgeşmeler logotipe, şrifte we reňk palitrasyna täsir etdi.
Logotipdäki üýtgeşmeler birbada göze ilmeýär. Eger ünsli seretseň, onda “gülüň” ortasyndaky giňişligiň birneme ulalandygyny, çyzyklaryň bolsa has güberendigini görmek bolýar. Asyl logotip baş müdir Sem Altman we egindeş esaslandyryjy Ilýa Suskewer tarapyndan döredilipdi. Täze görnüşi OpenAI-iň dizaýnerleri Weýt Mýoller we Şennon Ýager işläp düzdi.
Rebrendingiň has möhüm bölegi täze OpenAI Sans şrifti boldy. Kompaniýanyň aýtmagyna görä, ol tegelek, elýeterli nyşanlary geometrik takyklyk we funksionallyk bilen utgaşdyrýar. Kompaniýanyň adyndaky “O” harpyna aýratyn üns berildi: onuň daşky çyzygy ideal tegelek, içkisi bolsa – ýörite ideal däl görnüşde çyzyldy. Şeýle-de, häzir şrift bilen nyşany biri-birinden aýratyn ulanmak bolýar, öň olar biri-biriniň üstüni ýetirýärdi.
“Biz fotografiýa, tipografiýa, animasiýa we giňişlik dizaýny boýunça öňdebaryjy hünärmenler bilen işleşip, ideýalary dörediji hökmünde DALL·E, ChatGPT we Sora ýaly EA gurallaryny ulanýarys. Ynsan intuisiýasyny generatiw EA mümkinçilikleri bilen utgaşdyrýan bu ikitaraplaýyn çemeleşme bize diňe bir innowasion däl, eýsem çuňňur ynsanlaşdyrylan brendi döretmäge kömek etdi” – diýip, OpenAI belledi.
