Universal Pictures «Ýura eýýamynyň dünýäsi: Gaýtadan dogluş» (Мира Юрского периода: Перерождение) filminiň treýlerini hödürledi. Film bütin dünýäde 2025-nji ýylyň 2-nji iýulynda görkezilip başlanar diýip, Forbes neşiri habar berýär.
Filmiň wakalary dinozawrlaryň sanynyň ep-esli azalan dünýäsinde bolup geçýär. Bu gadymy jandarlar indi berk gözegçilik astyndaky ýörite biosferalarda ýaşaýarlar. Emma üç sany aýratyn dinozawr wakalaryň esasy bölegine öwrülýär, sebäbi olaryň genetiki materialy mümkin bolan halas ediji dermanyň esasy bolup biler.
Baş gahryman Zora Bennetti gizlin operasiýalar boýunça hünärmen diýip atlandyryp bolar. Ol zerur bolan genetiki materialy dinozawrlardan almak wezipesini öz üstüne alýar. Ýöne işler meýilleşdirilişi ýaly bolmaýar: Zora, tötänlik bilen wakalaryň merkezine düşen adaty maşgalanyň agzalary bilen bilelikde bir ada düşýär. Bu adada bolsa adamzat üçin onlarça ýyl bäri syr bolup galan bir hakykat gizlenýär.
Baş gahrymanyň keşbini meşhur aktrisa Skarlett Ýohansson ýerine ýetirýär. Aktýorlar düzüminde Maherşala Ali, Jonatan Beýli, Ruper Frend, Manuel Garsiýa-Rulfo, Luna Bleýz we beýlekiler bar.
Filmiň täze bölümine «Godzilla» we «Kezzabyň biri. Ýyldyz söweşleri: Hekaýalar» (Изгой-один. Звёздные войны: Истории) filmleri bilen tanalýan meşhur režissýor Garet Edwards ýolbaşçylyk edýär.
