Prezident Serdar Berdimuhamedow Serdar Joraýewi maliýe we ykdysadyýet ministri wezipesinden boşatdy. Degişli Permana döwlet Baştutany 7-nji fewralda 2024-nji ýylyň jemlerine bagyşlanyp geçirilen giňişleýin Hökümet mejlisinde gol çekdi.
Döwlet Baştutany bu wezipä Mämmetguly Astanagulowy belläp, ony maliýe we ykdysadyýet ministriniň orunbasary wezipesinden boşatdy.
Türkmenistanyň Prezidentiniň Karary bilen, Serdar Açyldurdyýewiç Joraýew şeýle hem Türkmenistanyň Hökümetinden Ýewropa Bileleşiginiň halkara tehniki kömek baradaky milli utgaşdyryjysy we Bütindünýä bankynyň Türkmenistandan dolandyryjysy wezipelerinden boşadyldy. Bu wezipä maliýe we ykdysadyýet ministri Mämmetguly Rozygulyýewiç Astanagulow bellenildi.
Hökümet mejlisinde bellenilişi ýaly, 2024-nji ýylyň jemleri boýunça ýurdumyzyň baş maliýe meýilnamasynyň girdeji bölegi 105,9 göterim, çykdajy bölegi bolsa 99,9 göterim berjaý edildi.
Hasabat döwründe ýerli býujetleriň girdeji bölegi 103,8 göterim, çykdajy bölegi bolsa 99,8 göterim ýerine ýetirildi.
Geçen ýylda maliýeleşdirmegiň ähli çeşmeleriniň hasabyna milli ykdysadyýetimizi ösdürmäge gönükdirilen maýa goýumlarynyň möçberi 2023-nji ýylyň degişli döwri bilen deňeşdirilende, 9,1 göterim artdy we jemi içerki önümiň 17,6 göterimine deň boldy. Özleşdirilen düýpli maýa goýumlarynyň 49,3 göterimi önümçilik hem-de 50,7 göterimi durmuş we medeni maksatly binalara gönükdirildi.
