Ispaniýanyň hökümeti iş hepdesini zähmet hakyny üýtgetmezden 40 sagatdan 37,5 sagada çenli azaltmak kararyna geldi diýip, Reuters agentligi habar berýär.
Nobatdaky mejlisiň dowamynda hökümet iş wagtynyň günde 8 sagatdan 7,5 sagada çenli azaldylmagyny tassyklady. Bu başlangyç zähmet ministri Ýolando Dias tarapyndan öňe sürüldi. Onuň aýtmagyna görä, täze iş tertibi “has gowy ýaşamak, az işlemek we ykdysady taýdan has öndümli we netijeli bolmak” üçin gönükdirilýär.
Bu kanun taslamasy heniz parlament tarapyndan tassyklanmaly. Munuň üçin bolsa dolandyryjy partiýalara oppozisiýa goldawy gerek.
EADaily neşiriniň ýazmagyna görä, bu geçiş 12 milliondan gowrak adama täsir eder. Şeýle başlangyç işçiler we kärdeşler arkalaşyklary tarapyndan goldanyldy, ýöne ýurduň iş berijiler assosiasiýasy muňa garşy çykdy. Assosiasiýa bu çözgüdiň iş çykdajylaryny artdyrjakdygyny we kompaniýalaryň bäsdeşlik ukybyny peseltjekdigini belleýär.
Işewürlik wekilleri bilen geçirilen gepleşikler heniz noýabr aýynda şowsuz bolupdy. Şol wagt iş berijiler iş hepdesiniň gysgaldylmagynyň kanunlar bilen däl-de, her bir kompaniýanyň zerurlyklaryny göz öňünde tutup, köpçülikleýin şertnama bilen düzgünleşdirilmelidigini nygtady.
Gysgaldylan iş hepdesiniň tejribesi eýýäm beýleki ýurtlarda ulanylýar. Mysal üçin, geçen ýylyň güýzünden Islandiýada işçileriň ýarysyndan gowragy zähmet hakyny azaltmazdan dört günlük iş hepdesine geçdi. Tejribe munuň öndürijiligi peseltmän, tersine ykdysady ösüşe ýardam edendigini görkezdi.
