OpenAI kompaniýasy ChatGPT-niň bir bölegi bolan emeli aň (EA) gözleg hyzmatyny ulanmak üçin indi hasaba alynmagyň zerur däldigini mälim etdi. Bu hyzmat ChatGPT çat-botuna internetdäki maglumatlara esaslanyp jogap bermäge we ulanylan çeşmeleriň sanawyny görkezmäge mümkinçilik berýär diýip, The Verge neşiri habar berýär.
OpenAI ilkinji gezek öz gözleg hyzmatyny geçen ýylyň oktýabr aýynda ChatGPT-niň tölegli abunaçylary üçin işe girizipdi, dekabrda bolsa hemmeler üçin elýeterli etdi. Indi bolsa ony ulanmak üçin hasaba alynmak zerur däl. Şol sebäpden, ChatGPT-niň gözleg hyzmaty indi adaty gözleg hyzmatlary bilen, mysal üçin Ýandeks, Google we Bing bilen göni bäsleşip başlar. Bulardan Google we Bing öz gözleg hyzmatlarynda EA-ny eýýämden ornaşdyryp, ulanyp gelýärler.
ChatGPT-niň gözleg hyzmaty ýakyn wagtda täzelendi. Indi her bir gözlegiň netijesi boýunça gysgaça düşündirişleri, şeýle hem görnükli ýerleriň kartalaryny we suratlaryny görüp bolýar.
Belläp geçsek, OpenAI öz gözleg hyzmatyny işe girizen ilkinji EA ulgamlaryny işläp düzüji däldir. Perplexity hem internetden maglumat gözlemäge mümkinçilik berýär we registrasiýa talap etmeýär. Ýakyn wagtda bu ulgam myhmanhanalar we olaryň bahalary barada maglumatlary gönüden-göni TripAdvisor-dan görkezip başlady.
