Gazagystanly işewür Tursengali Alaguzow Almatynyň “Kaýraty” Çempionlar ligasynyň umumy tapgyrynyň 2-nji oýnunda Madridiň “Realyny” utsa, toparyň futbolçylaryna awtomobil sowgat bermegi wada berdi.
Oýun 30-njy sentýabrda Aşgabat wagty bilen 21:45-de bolar.
“Biz 10 günden söýgüli “Kaýratymyzyň” Madridiň “Realy” bilen oýnajakdygyny bilýäris. Şonuň üçin men respublikanyň watançysy hökmünde we öz doglan günümiň öňüsyrasy “Kaýrat” topary utan ýagdaýynda oýnan oýunçylaryň ählisine awtomobil sowgat etjekdigime söz berýärin. Alma-Ata – dünýä paýtagty, “Kaýrat” – çempion!” – diýip, işewür öz wideo ýüzlenmesinde aýtdy.
Tursengali Alaguzow – multimillioner we alkogolsyz içgileri öndürýän “Galanz bottlers” kompaniýasynyň eýesi. Forbes Kazakhstan-yň maglumatlaryna görä, ol ýurduň iň baý işewürleriniň reýtinginde 61-nji orny eýeleýär. Onuň baýlygy 130 mln dollar diýlip hasaplanýar.
