OpenAI kompaniýasy ChatGPT EA-botuna internet gözleginiň girizilendigini habar berdi. Öň SearchGPT ady bilen beta-wersiýa görnüşinde hödürlenen täze funksiýa indi gönüden-göni ChatGPT-ä birleşdirildi.
Bu funksiýany ilkinji bolup ChatGPT-niň tölegli wersiýalaryna ýazylan ulanyjylar synap biler. Mugt ulanyjylar, korporatiw müşderiler we bilim edaralary üçin web-gözleg ýakyn hepdelerde elýeterli bolar.
Işläp düzüjiler SearchGPT-ni aýratyn önüm hökmünde çykarman, ony ChatGPT bilen birleşdirmek kararyna geldiler. Algoritm ulanyjylaryň soraglary esasynda web-gözlegiň zerurlygyny özbaşdak kesgitleýär, ýöne ulanyjylar ony el bilen hem işledip biler. Şeýle integrasiýa eýýäm köpden bäri web-gözlegi hödürleýän Microsoft Copilot bilen Google Gemini-niň bäsdeşlik artykmaçlygyny aradan aýyrýar.
ChatGPT-de gözleg aktual maglumatlara – sport netijelerine, paý bahalaryna we beýleki maglumatlara onlaýn režimde elýeterlilik berýär. Ähli maglumat çeşmeleri ilkinji çeşmelere salgylanmalar bilen berilýär. Oňaýlylyk üçin makalanyň gysgaça beýanyny görkezýän gapdal panel hem goşuldy. Täze funksiýa Android, iOS, macOS we Windows ýaly ähli ChatGPT platformalarynda elýeterli bolar.
