Peghem obasynda (Günbatar Sasseks, Beýik Britaniýa) 12 ýaşly Rouen Brennan biziň eramyzyň I asyry bilen senelenýän Rim döwrüniň seýrek altyn bilezigini tapdy. Ilkibaşda oglanyň ejesi artefaktyň gymmatyny bilmän, ony zyňmagy tabşyrdy, ýöne Rouen ony saklamak kararyna geldi diýip, Popular Mechanics habar berýär.
Waka üç ýyl ozal, Rouen Angliýanyň günorta kenarynda ejesi we iti bilen gezelenç edip ýören wagty bolup geçdi. Ol ýerde metal bölegini görüp, onuň altyn bolup biljekdigini çaklady. Soňra munuň Rim döwründe esgerlere edermenligi üçin berlen harby bilezikdigi anyklandy.
“Rouen ownuk-uşak zatlary çöplemegi hemişe gowy görerdi. Menem her gezek “Taşla muny, ol hapa” diýýärin. Ýöne bu gezek ol bu metal bölegini, altyndygyna ynanyp, elinde saklamagyny dowam etdirdi” – diýip, çaganyň ejesi Sussex Express bilen söhbetdeşlikde aýtdy.
Bilezik ilkibaşda, tä myhmanlaryň biri ony zergäre görkezmegi teklip edýänçä, öýde ünssüz saklandy. Ahyrynda zergär onuň hakykydygyny tassyklady. Soňra tapyndy seljeriş üçin britan muzeýine iberildi. Çiçester etrap geňeşiniň hünärmenleri bilezigiň biziň eramyzyň 43-nji ýylynda rimlileriň Britaniýa çozup giren döwrüne degişlidigini we onuň edermenlik üçin sylaglanan esgere degişli bolup biljekdigini belledi.
Indi bilezik Nowum muzeýinde saklanýar. Çiçester etrap geňeşiniň ýolbaşçysy Adrian Moss tapyndynyň wakasynyň “Eger daş-töweregiňe ünsli seretseň, haçan nämäni tapjakdygyňy bilmeýändigiňi” görkezýändigini belleýär.
