24-nji sentýabrda irden Bangkokyň taryhy böleginde Wajir hassahanasynyň golaýynda uly oý emele geldi. Onuň çuňlugy, takmynan, 50 metre, diametri bolsa 30 metre barabar. Köçäniň bir böleginiň aşak çökmegi netijesinde awtomobiller we elektrik geçiriji liniýalaryň sütünleri ýeriň aşagyna gitdi.
Deslapky maglumatlara görä, hiç kim zyýan çekmedi diýip, South China Morning Post habar berýär.
Zyýan ýeten turbalardan suw akdy, üzülen kabeller bolsa uçgunlap başlady, bu hem şaýatlaryň arasynda howsala döretdi. Häkimiýet derrew ýollary ýapyp, hassahanadan hassalary we golaýdaky jaýlardan ýaşaýjylary ewakuasiýa etdi.
Tailandyň Milli maglumat edarasy çukuryň giňelmegini dowam etdirýändigini habar berdi. Häzir halasgärler we inženerler täze opurylmalaryň öňüni almak üçin topragy berkitmegiň üstünde işleýär.
Ýerli ýaşaýjylar çukuryň metro liniýasynyň gurluşygy bilen baglanyşyklydygyny öňe sürýär, ýöne muňa resmi taýdan tassyklama ýok.
Bu ýagdaýy Aziýa inen güýçli “Ragasa” tupany has-da kynlaşdyrýar. Meteorologlar güýçli ygallaryň täze süýşgünlere we suw basmalaryna getirip biljekdigini duýdurýar.
Hadysanyň bolan ýerine Bangkokyň gubernatory Çadçart Sittipun geldi. Şäher administrasiýasy paýtagtyň derýanyň boýundaky düzlükde ýerleşýändigini, şol sebäpli topragyň gowşakdygyny, dykyz gurluşyklaryň bolsa ony has ejizledýändigini belledi.
