Beýik Britaniýanyň patyşasy Karl III amerikan Vogue žurnalynyň baş redaktory Anna Wintury baýrak bilen sylaglady. Baýragyň gowşurylyş dabarasy Bukingem köşgünde geçirildi. Bu barada şa maşgalasynyň resmi Instagram akkauntynda habar berilýär.
Wintur Hormat kawalerleriniň ordenini aldy. Şeýle hormata diňe 65 adam we monarhyň özi mynasyp bolup bilýär. Baýrak sungatda, edebiýatda, aýdym-sazda, ylymda we beýleki ugurlarda gazanylan üstünlikler üçin berilýär. Wintur ony moda pudagyndaky hyzmatlary üçin aldy. Bu ordene mynasyp bolanlaryň arasynda Elton Jon, Pol Makkartni, Keýt Middldon hem bar.
Wintur şeýle hormata mynasyp görlendigine “geň galandygyny we duýgulara gaplanandygyny” belledi. “Bu meniň entek gazanmaly zatlarymyň köpdügine hasam ynandyrdy” – diýip, žurnalist belledi.
2017-nji ýylda Anna Wintur moda we žurnalistika goşan goşandy üçin şa aýaly Ýelizaweta II-den hanym titulyny alypdy.
Wintur 1949-njy ýylda dünýä indi. Ol amerikan Vogue žurnalynyň redaksiýasyna 1988-nji ýylda ýolbaşçy boldy. Ondan öň britan neşiriniň baş redaktory bolupdy. Žurnalist “Şeýtan Prada geýýär” (Дьявол носит Prada) filmindäki Miranda Pristliniň prototipi boldy.
