Tehnoägirdi Samsung-yň täze patenti akylly ýüzügiň geljekki modeliniň beýleki enjamlary dolandyrmaga mümkinçilik berjekdigini görkezýär diýip, Gizmochina habar berýär.
Samsung kompaniýasy Intellektual eýeçiligiň bütindünýä guramasyna (WIPO) patent arzasyny tabşyrdy. Bu arzada akylly ýüzügiň geljekki modeli bilen kompaniýanyň beýleki enjamlaryny dolandyryp boljakdygy barada aýdylýar.
Häzirki wagtda Samsung-yň diňe bir akylly ýüzügi bar. Kompaniýanyň Galaxy Ring 2 modeli bilen baglanşykly işleri alyp barýandygy hakynda maglumatlar hem bar. Galaxy Ring-iň ilkinji nesli ýürek urgusyny ölçäp, uky ýagdaýyny hem-de beýleki biometriki görkezijileri yzarlaýar we ähli maglumatlary «Samsung Health» (Samsung Saglyk) programmasy arkaly smartfona iberýär.
Saglygy gözegçilikde saklamagyň bu usuly, akylly sagat ulanmagy halamaýanlar üçin amatlydyr.
Täze patent şol bir wagtyň özünde, Samsung-yň täze enjamyna goşmaça mümkinçilikleri ornaşdyrmagy maksat edinýändigini görkezýär. Patent maglumatlaryna we çyzgylaryna görä, akylly ýüzügi ulanýan adam simsiz baglanşyk arkaly beýleki enjamlary dolandyryp biler. Täze Galaxy Ring akylly ýüzüginiň, meselem, noutbuk bilen planşetiň arasynda utgaşykly işlemegine garaşylýar.
Patentlenen täze tehnologiýa, akylly ýüzügiň bir ekrandaky mazmuny başga bir ekrana geçirmek üçin ulanylyp bilinjekdigini görkezýär. Bu mümkinçilik Apple-yň ekoulgamyna meňzeýär. Ýatlatsak, Samsung-yň «S Pen» stilusy hem şuňa meňzeş aýratynlygy hödürläpdi.
