6-njy fewrala çenli “Sonik 3 kinoda” (Соник 3 в кино) filminiň dünýädäki kassa ýygymy 463 mln dollara ýetdi we bu hem ony taryhda ikinji iň girdejili wideooýun ekranlaşdyrmasyna öwürýär. Ondan öňde diňe doganlar Mario baradaky multfilm bar.
Gök kirpiniň başdangeçirmeleri baradaky trikwel kinoteatrlarda görkezilmegini dowam etdirýär. ABŞ-nyň kinoteatrlarynda lentanyň girdeji ýygymy 231 mln dollar boldy, ol beýleki ýurtlarda-da şonça gazandy – 232 mln dollar. Deňeşdirmek üçin, seriýanyň birinji bölümi 320 mln dollar, ikinjisi 405 mln dollar gazandy.
Uly üstünlige garamazdan, iň girdejili wideooýun ekranlaşdyrmasy adyny almak üçin üçünji “Sonige” tas üç esse köp gazanmak gerek – “Doganlar Super Mario kinoda” (Братья Супер Марио в кино) 1,359 mlrd dollar gazandy. Degişli reýtingiň üçünji ornunda 438,8 mln dollar bilen “Warkraft” (Варкрафт) ýerleşdi. Onuň yzyndan “Pokemon: Detektiw Pikaçu” (Покемон: Детектив Пикачу / $428,9 mln) gelýär, bäşligi Dueýn Jonson we 427,9 mln dollar bilen “Rempeýj” (Рэмпейдж) jemleýär. “Sonik 2 kinoda” altynjy orunda ýerleşýär.
Şol bir wagtyň özünde, “Mufasa: Şa Ýolbars” (Муфаса: Король лев) animasion filminiň 18-nji fewralda onlaýn çykjakdygy belli boldy. Ol Disney+, Apple TV+, Amazon Prime, Vudu we beýleki hyzmatlarda elýeterli bolar. Prokatyň dowamynda lenta 650 mln dollar gazandy, bu oňa 200 mln dollarlyk býujeti we marketing çykdajylaryny ödemäge mümkinçilik berýär.
