Geçen ýylda Hytaýda gibrid we elektrikli awtoulaglary hem hasaba almak bilen, jemi 22,9 million ýeňil awtoulag öndürildi. Şu ýyl bolsa SAE klassifikasiýasyna laýyklykda, sürüjä ikinji derejeli awtonom kömek ulgamyny hödürleýän takmynan 15 million awtoulag ýola çykarylar diýip, South China Morning Post neşiri habar berýär.
Ikinji derejeli awtonomlyk, ulaga käbir hereketleri awtomatiki ýerine ýetirmäge mümkinçilik berýär. Awtoulag tizligini artdyryp, peseldip, ýönekeýje manýowrlary ýerine ýetirip bilýär, ýöne sürüji ruly eli bilen saklamaly we ýola gözegçilik etmeli bolýar.
China EV100 senagat birleşiginiň wekilleriniň aýtmagyna görä, şu ýyl Hytaýda satyljak ýeňil awtoulaglaryň üçden ikisi ikinji derejeli awtopilot bilen üpjün ediler. Şeýle funksiýaly awtoulaglaryň elýeterli bolmagy, ýerli öndürijiler üçin müşderileri özüne çekmegiň täze usulyna öwrüler.
SAE klassifikasiýasyna görä, üçünji derejeli awtonomlyk sürüjä ruly doly goýbermäge mümkinçilik berýär. Dördünji dereje bolsa sürüjiniň yzygiderli ýol gözegçiligini talap etmeýär, ýöne zerur ýagdaýda dolandyryşy yzyna almak mümkinçiligi saklanýar. Bäşinji derejeli awtonomlyk bolsa, sürüjini adaty dolandyryşdan mahrum edýär we ulag ähli zady awtomatiki amala aşyrýar. Umuman alanyňda sürüji ýolagça öwrülýär.
Käbir çaklamalara görä, diňe ýük ulaglarynyň awtopilot ulgamyna geçmegi bilen, Hytaýda 2030-njy ýyla çenli sürüjilere tölenýän zähmet haklary boýunça her ýyl 250 milliard dollar tygşytlamak mümkin bolar. Netijede, logistika kompaniýalary ýük daşamak boýunça çykdajylaryny has-da azaldyp bilerler, bu bolsa Hytaýyň ykdysadyýetine oňyn täsir eder.
