Türkmenistanyň Daşary işler ministrliginiň Halkara gatnaşyklary institutynda 28-nji fewralda Aşgabat wagty bilen sagat 14:00-da «Dil hoşniýetli gatnaşyklaryň iň möhüm serişdesidir» atly halkara usuly-okuw maslahaty geçiriler. Institut ýurdumyzyň we daşary ýurtlaryň ýokary okuw mekdepleriniň mugallymlaryny maslahata gatnaşmaga çagyrýar.
Maslahat okatmagyň häzirki zaman usullaryny ulanmakda tejribe alyşmagy ýola goýmak maksady bilen geçirilýär.
Maslahat türkmen, iňlis, rus we nemes dillerinde garyşyk görnüşde geçiriler.
Halkara usuly-okuw maslahatynyň çäginde daşary ýurt dillerini öwrenmegiň ähmiýeti we olary okatmagyň işjeň hem innowasion usullarynyň ulanylyşyny bilelikde ara alyp maslahatlaşmak meýilleşdirilýär.
Maslahata gatnaşmaga isleg bildirýän mugallymlar 15-nji fewrala çenli hasaba alyş soragnamany we çykyşyny tdimddk@gmail.com elektron salgysy boýunça guramaçylyk toparyna ibermelidir. Soragnamany doldurmagyň nusgasy Türkmenistanyň Daşary işler ministrliginiň saýtynda ýerleşdirilendir. Mugallymlar hasaba alnandyklary barada habary, şeýle hem çykyşlarynyň mowzuklary boýunça maglumatlary 23-nji fewrala çenli elektron poçta arkaly alarlar.
Goşmaça maglumat institutyň ýokarda görkezilen saýtynda, guramaçylyk toparynyň elektron poçtasy we +993 61201906 belgili telefon arkaly elýeterlidir.
