Apple kompaniýasynyň golçur markasy Beats öň hem Powerbeats Pro 2 nauşnikleriniň şu ýyl hödürlenjekdigini tassyklapdy. Indi bolsa Bloomberg žurnalisti Mark Gurman PowerBeats Pro 2 nauşnikleriniň resmi taýdan 11-nji fewralda hödürlenjekdigini we olaryň bahasynyň 250 dollar boljakdygyny aýtdy diýip, MacRumors habar berýär.
PowerBeats Pro nauşnikleri sport bilen meşgullanýanlar we fitnes bilen gyzyklanýanlar üçin AirPods Pro-nyň alternatiwasy hökmünde hödürlener. Olaryň gurluşynda gulakda has ygtybarly saklanmagyny sazlaýan gulak çyzyklary (arkalyklary) bar. Gurmanyň maglumatlaryna görä, täze PowerBeats Pro 2 nauşnikleri AirPods Pro 2-de ulanylýan Apple H2 çipi bilen üpjün ediler. Bu bolsa 2019-njy ýylda çykarylan ilkinji modele garanyňda, täze modelde işjeň ses basyş funksiýasynyň ep-esli gowulandyrylandygyny aňladýar.
Öň hem habar berşimiz ýaly, PowerBeats Pro 2 türgenleşik wagtynda ýürek urşunyň ritmini yzarlamak ukybyna eýe bolar. iOS 18 operasion ulgamynyň kodlarynda bu nauşnikleriň dürli sport enjamlary bilen sinhronlaşyp biljekdigi görkezilýär. Bu aýratynlyk maşk wagtynda ýürek urgusyny ölçemäge mümkinçilik berer, ýygnalan maglumatlar bolsa iPhone-daky «Saglyk» (Health) programmasynda we beýleki goldanylýan hyzmatlarda elýeterli bolar.
Gurmanyň berýän maglumatlaryna görä, PowerBeats Pro 2 nauşnikleri täze reňk görnüşlerinde, şol sanda açyk mämişi (narynç) reňkde hem hödürlener. Mundan başga-da, ses hiliniň gowulandyrylandygy, batareýasynyň işleýiş wagtynyň artdyrylandygy, Android ulgamynda işeýän smartfonlar bilen baglanşygyň has-da optimallaşdyrylandygy we zarýad korpusynyň USB Type-C interfeýsi bilen üpjün edilendigi çaklanylýar.
