Beats kompaniýasy Powerbeats Pro 2 nauşnikleriniň şu ýyl hödürlenjekdigini tassyklady. Apple kompaniýasynyň golçur markasy bolan Beats tarapyndan hödürlenjek täze nauşnikler owadan dizaýny we saglygy gözegçilikde saklamak boýunça täze funksiýalary bilen AirPods-a bäsdeş bolar diýip, MacRumors belleýär.
Bu model, takmynan, alty ýyl mundan ozal hödürlenen asyl görnüşiniň dowamydyr. Resmi tanyşdyrylyşdan öň, enjam ABŞ-nyň FCC we Hindistanyň BIS sertifikasiýasyndan geçdi. Model belgileri şulardyr: A3157, A3158 we A3160. Nauşnigiň çep we sag taraplarynyň aýratyn bellige alnandygy barada aýdylýar.
Powerbeats Pro 2, iOS we Android ulgamlaryny goldaýar. Täze model Bluetooth Low Energy tehnologiýasy bilen enjamlaşdyrylyp, ol 2400-2483,5 MGz aralygyndaky ýygylykda işleýär. Şeýle-de AirPods Pro 2-däki ýaly şol bir wagtda birnäçe enjama birikmek funksiýasy bu nauşniklerde ýokdur.
Ilkinji suratlara görä, nauşnikler inçe görnüşli, USB-C portly we gulaga berkidilýän halkajykly bolup, olar gara we ak reňkli görnüşlerde hödürlener.
Garaşylýan aýratynlyklaryň arasynda ýürek urgusyny ölçemek, işjeň sesi ýatyrmak (daşky sesleri ýatyrmak üçin ulanylýan tehnologiýa), giňişlikdäki ses (spatial audio) we aýdyňlyk režimi (transparency mode) bar.
Powerbeats Pro 2 nauşnikleri Wýetnamda ýasalýar, emma olar ABŞ-da işlenip düzülýär.
