3-nji fewralda Türkmenistanyň Belarusdaky ilçihanasynda ilçi Nazarguly Şagulyýew Polesk döwlet uniwersitetiniň rektory Waleriý Dunaý bilen duşuşdy. Bilim hyzmatdaşlygynyň ösdürilmegi we türkmen talyplarynyň okuw şertleri duşuşygyň esasy mowzugy boldy diýip, ORIENT habar berýär.
Rektor Brest oblastynyň Pinsk şäherinde ýerleşýän uniwersitetiň işi barada gürrüň berdi. Häzirki wagtda bu ýokary okuw mekdebinde 3215 talyp bilim alýar, olaryň 80-si daşary ýurtly bolup, şolaryň 19-sy Türkmenistanyň raýatlarydyr.
Polesk döwlet uniwersiteti bäş fakultetiň düzümindäki 11 kafedrada hünärmenleri taýýarlaýar. Okuw maksatnamalary ykdysadyýet, maliýe, biotehnologiýa, inženerçilik, maglumat tehnologiýalary we beýleki ugurlar boýunça 18 hünäri öz içine alýar.
Ilçi Şagulyýew ikitaraplaýyn gatnaşyklary berkitmekde bilim hyzmatdaşlygynyň ähmiýetini nygtady. Ol talyplaryň sanynyň artmagynyň, olaryň okuw şertleriniň gowulandyrylmagynyň we akademiki tejribe alyşmagyň uzak möhletleýin esasda ýurtlaryň arasyndaky medeni dialogy we hyzmatdaşlygy ösdürmäge goşant goşýandygyny belläp geçdi.
