Blue Abyss iňlis kompaniýasy we NASA-nyň Glenn barlaglar merkezi astronawtlary taýýarlamak üçin infrastrukturany we tehnologiýalary ösdürmäge gönükdirilen hyzmatdaşlyk şertnamasyny baglaşdy. Hyzmatdaşlygyň çäklerinde Aýdaky we Marsdaky şertlere meňzeýän ekstremal simulýasiýa ulgamlary işlenip taýýarlanar diýip, Electronic Specifier habar berýär.
Taraplar astronawtlary taýýarlamak üçin täze tehnologiýalary we simulýatorlary döretmegi, şol sanda suwasty modullary, parabolik uçuşlary we giňeldilen hakykaty ulanmagy meýilleşdirýärler.
Hyzmatdaşlyk Ýeriň pes orbitasynda, Aýyň töweregindäki giňişlikde, şeýle hem Aýyň we Marsyň şertlerinde işlemek üçin okuwlary öz içine alýar. NASA täjirçilik obýektleriniň we hyzmatlarynyň işlenip taýýarlanyşyna ýol görkezmek üçin tehniki goldawy berer we kosmos barlaglary ugrundaky tejribesini paýlaşar. Blue Abyss bolsa uzak möhletleýin infrastrukturanyň talaplaryny kesgitlemek üçin marketing barlaglaryny geçirer.
Alnan maglumatlar NASA-nyň geljekki täjirçilik mümkinçiliklerine baha bermäge we olary öňdäki kosmos programmalaryna goşmaga kömek eder.
