Astronomlar ýakynda kosmosda asteroid diýlip hasaplanýan, 2018 CN41 atly jisimiň aslyýetinde Ilon Maskyň Tesla Roadster awtoulagydygyny anykladylar. SpaceX kompaniýasy ony 2018-nji ýylda Falcon Heavy raketasy arkaly kosmosa iberipdi diýip, Live Science habar berýär.
Şol wagt awtoulagyň ruluna «Starmen» atly skafandrly maneken ýerleşdirilipdi. Ulagyň içinde Dewid Bouiniň «Space Oddity» albomy gaýta-gaýta goýberilip, ol Marsa tarap gönükdirilipdi.
Kompaniýalar we kosmos agentlikleri raketalary we emeli hemralary olaryň işläp duran wagtynda yzarlaýarlar. Emma ulanyşdan galansoň köplenç olary unudýarlar. Eger-de kosmos galyndylary asteroid bilen çalşylsa, bu ylmy we maliýe serişdeleriniň dereksiz sarp edilmegine sebäp bolup biler.
2018 CN41 jisimi, ýagny Tesla Roadster awtoulagy şu ýylyň ýanwar aýynda Ýere ýakynlaşýan asteroidleriň sanawyna girizilipdi. Güman edilmegine görä, bu maglumat öwrenje türk astronomy tarapyndan berlipdir. Ol arhiw maglumatlaryny seljerip, bu açyşy edipdir. Emma bir gün hem geçmänkä, Halkara astronomiýa bileleşiginiň (IAU) Kiçi planetalar merkezi (MPC) bu maglumatlaryň nädogrudygyny aýdyp, resmi bildiriş çap edipdir.
Maskyň Tesla awtoulagy, garaşylşy ýaly, Marsyň orbitasyna girip bilmedi. Onuň ýerine ol Günüň daşyndan aýlanýan orbita geçdi. Geljekde ol wagtal-wagtal Ýere we Marsa ýakynlaşar.
