Renault görkezmek üçin niýetlenen täze Filante Record 2025 elektromobilini hödürledi. Onuň maksady energiýa netijeliligi we geçilýän menziliň uzaklygy boýunça rekord goýmakdan ybarat.
Bir orunlyk konsept markanyň üç sany taryhy modelinden ylham alan özboluşy dizaýna eýe boldy we geljekden gelen awtomobile meňzeýär. Şeýle-de, dizaýn diňe bir futuristik däl, eýsem aerodinamik boldy. Öňdäki tegelek faralar 1920-nji ýyllaryň 40 CV des Records modeline salgylanýar, tigirler 1934-nji ýylyň Nervasport awtomobili ýaly daşyna çykarylan, arkalar bolsa 1956-njy ýylyň turbinaly Etoile Filante awtomobilindan ylham alýar.
Awtomobiliň uzynlygy 5,12 metr, ini – 1,71 metr, agramy bolsa bary-ýogy 1 000 kg. Olardan 600 kg 87 kWt/sag sygymly batareýanyň, galan 400 kg alýuminden, polatdan we karbondan ýasalan kuzowyň paýyna düşýär. Renault agramy azaltmak üçin emeli aňdan we 3D çap usulyndan peýdalandy.
Energiýa netijeliligi ýörite 19 dýuýmlyk Michelin şinalarynyň hasabyna ýokarlandyryldy. Tapgyrlaýyn modellerden tapawutlylykda, batareýa elementleri gönüden-göni bloga birleşdirildi. Bu tehnologiýa bloguň agramyny azaltmaga we onuň gurluşyny optimizirlemäge mümkinçilik berdi.
Filante Record 2025 awtomobiliniň premýerasy 5 – 9-njy fewralda Pariždäki Rétromobile sergisinde geçiriler. Renault ýylyň birinji ýarymynda awtomobili hakyky ýollarda synagdan geçirmegi meýilleşdirýär.
