Hytaý çuň guýulary gazmak üçin niýetlenen ösen tehnologiýalary we enjamlary döretmek boýunça milli maksatnamasyny işe girizdi. Bu taslamanyň esasy maksady – 15 müň metr çuňlukda işlemäge ukyply ilkinji akylly aşa çuň burawlaýyş desgasyny döretmekdir. Häzirki wagtda Hytaýyň iň çuň guýusy 11 müň metre ýetýär diýip, South China Morning Post neşiri habar berýär.
Hytaýyň «Sinhua» habarlar agentligi, «Deep Earth» atly bu ylmy-tehniki megataslamanyň başlangyçdygyny we onuň ýurduň energiýa hem-de tebigy baýlyk howpsuzlygyny üpjün etjekdigini habar berdi. Taslamany Hytaýyň geologiýa ylymlary akademiýasy (CAGS), birnäçe uniwersitetler, ylmy-barlag institutlary we kärhanalar bilelikde amala aşyrýarlar.
Jilin uniwersitetiniň berýän maglumatlaryna görä, taslamada birnäçe tehniki kynçylyk bar. Olaryň arasynda ýokary temperaturalarda burawyň erginini dogry dolandyrmak, burawyň aşa uzyn turbalaryny awtomatlaşdyrylan ulgama laýyk utgaşdyrmak we 10 müň metrden çuň ýerlerde işlemäge ukyply akylly göwrüm alyş ulgamyny döretmek bar.
Häzirki wagtda Hytaýyň iň çuň nebit guýusy 11 müň metr bolup, ol dünýädäki ikinji iň çuň guýy hasaplanýar. Sinjýan welaýatynyň Şaýa etrabynda ýerleşýän bu guýy, Hytaýyň milli nebit korporasiýasy (CNPC) tarapyndan 2024-nji ýylyň mart aýynda tamamlandy.
