Arkadag şäherine jemagat hojalygy gulluklarynyň işi üçin niýetlenip satyn alnan täze tehnikalar geldi. 31-nji ýanwarda Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine amala aşyran iş saparynyň çäginde bu tehnikalar bilen tanyşdy.
Tanyşlykdan soň, tehnikalar Arkadag şäheriniň köçelerine çykyp, arassaçylyk işlerine girişdiler. Bellenilişi ýaly, häzirki zamanyň ösen tehnologiýalarynyň esasynda enjamlaşdyrylan tehnikalaryň geçen ugurlarynyň tämizligi we işiň netijeliligi ýokary halkara görkezijilere doly laýyk gelýär. Munuň özi “akylly” şäherde ähli ugurlar, şol sanda Jemagat hojalygy gullugy boýunça amala aşyrylýan işlere toplumlaýyn esasda çemeleşilýändiginiň nobatdaky güwäsidir.
Jemagat hojalygy gulluklaryna gelip gowşan täze tehnikalar şäherde arassaçylygy ýokary derejede saklamaga, köçeleri we desgalaryň daş-töweregini abadanlaşdyrmaga hyzmat eder.
