Nemes ekstremal sport türgenleri 2500 metr belentlikde howa şarlarynyň arasynda ýüpden geçip, dünýä rekordyny goýdular diýip, UPI habar berýär.
Germaniýaly iki batyr – Fridi Kýune we Lukas Irmler iki howa şarynyň arasynda dartylan ýüpden geçip, adatdan daşary görkezme çykyşyny ýerine ýetirdiler. Bu howply synanyşyk Ridering şäheriniň asmanynda geçirildi we olara Ginnesiň rekordlar kitabynda orun gazandyrdy. Şeýlelik bilen, olar 2021-nji ýylda goýlan 6236 futlyk (1900 metr) öňki rekordy täzelediler.
Ilkinji bolup ýüpden geçen Irmler bu synanyşygyň oňa ýeňil düşmändigini boýun aldy.
«Hakykatdanam üstümizde uly basyş bardy. Ähli zat gutaranda özümi gaty ýeňil duýdum» diýip ol belledi.
Dostunyň yzyna düşen Kýune bolsa Lukasyň daşyndan tomaşa etmegiň gaty gorkunçdygyny aýtdy.
Ekstremal sport türgenleri çylşyrymly şertler bilen ýüzbe-ýüz boldular: howa şarlary yzygiderli aýlanýardy, ýokaryk hem aşaklygyna hereket edýärdiler, bu bolsa synanşygy has-da kynlaşdyrýardy.
«Bir pursatda aşaklygyna ýöräp barýardyk, indiki pursatda bolsa ýokaryk çykýardyk. Ýüpdäki dartgynlyk bir güýçlenýärdi, bir gowşap gidýärdi» diýip olar gürrüň berdiler.
